Kryeministri Edi Rama ka zhvilluar këtë të martë takime në Fier ku ka diskutuar lidhur me arritjet dhe planet për energjinë elektrike. Ai tha se prodhimi i brendshëm i energjisë në Shqipëri është dyfishuar.
Rama shtoi se me fillimin e disa projekteve dhe zhvillimin e inovacionit, Shqipëria jo vetëm do të ketë energji të mjaftueshme por do të kthehet edhe një vend eksportues të energjisë.
Sipas tij brenda kësaj dekade Shqipëria do të jetë energjitikisht dhe totalisht i pavarur nga çdo zhvillim i jashtëm.
“Edhe sikur të kishim situatën e sektorit të energjisë ashtu siç ishte përpara këtij transformimi janë fakte kuptimplota dhe fakte që na bëjnë mjaft optimist për të nesërmen e sektorit dhe nëse e nesërmja e këtij sektori është optimiste, atëherë gjithë zhvillimi dhe e nesërmja e vendit është optimiste. Fakti që sot ne flasim për prodhim të brendshëm të thuajse dyfishuar është domethënës.
Kur mendon që ne nisëm këtë përpjekje me bazën prodhuese të kohës së komunizmit minus hidrocentralet që çuditshëm u hoqën nga stoku i aseteve të shtetit dhe iu dhanë privatit me një argumentim që në vetvete është vepër penale e pastër.
Sot ne kemi thuajse dyfishin në raport me nga u nisëm të prodhimit. Kjo nuk është vetëm rritja e prodhimit, është edhe diversifikimi i bazës që ishte vetëm hidro, gjë që ka ka vulnerabilitetin e kuptueshëm edhe pa e futur ndryshimin e klimës, ndërkohë që më ketë bëhet e paparashikueshme se si do të jetë e ardhmja e hidros.
Kështu që diversifikimi me 10% të prodhimit që sot vjen nga dielli, me fillimin edhe të disa projekteve të erës, me inovacionin e jashtëzakonshëm që do të kemi fatin të kemi në Shqipëri për sistemin e pompimit të ujit, kemi arsye të mendojmë se pavarësia e plotë energjitike e Shqipërisë është afër dhe transformimi nga një vend me hall të madh energjinë, në një vend eksportues neto të energjisë elektrike është afër.
Dy zhvillime historike që nëse gjërat shkojnë sipas planeve tona, bazuar në kërkesat që kemi aktualisht në administrim nga investitorët, dhe bazuar në atë që kemi planifikuar, brenda kësaj dekade Shqipëria do të jetë energjitikisht dhe totalisht i pavarur nga çdo zhvillim i jashtëm.
Pra do ta vendosë vetë fatin e vet në raport me energjinë dhe do të kalojë në eksport neto, që do të thotë se nuk është vetëm prodhimi por edhe transmetimi, që ka njohur progres të rëndësishëm, ashtu sikundër edhe shtrirja e gjithë rrjetit të transmetimit të Shqipërisë në të gjitha drejtimet, ku qershia mbi tortë është marrëveshja me Italinë.
Nga pikëpamja e humbjeve jemi në paramentra normalë të një vendi evropian, ndërkohë që ishim fenomen ekstra evropian. Për të gjetur të ngjashmit tanë, duhet të shkonim në vende shumë larg nga Evropa ku energjia ndahej sipas kapacitetit individual për ta vjedhur pse marrë në mënyrë të paligjshme. Ose për ta marrë ligjërisht dhe për të mos e paguar fare”,-tha Rama.
