Prej dy ditësh, televizioni News24 ndodhet pas sinjal, për shkak se iu ndërpre nga Qeveria, pasi në godinën ku ndodhej televizioni zbarkoi policia dhe ushtria, duke mos lejuar punonjëlsit të futen brenda. Godinën e mori nën administrim shoqëria shtetërore KAYO, e drejtuar nga Ardi Veliu, e cila do të prodhojë armë.
Këtë akt, opozita, aktivistë dhe organizata të mediave e kanë konsideruar si një sulm ndaj medias dhe fjalës së lirë.
Nisur nga kjo situatë, Asosacioni i Gazetarëve shqiptarë ka paralajmëruar ditën e nesërme mbajtjen e një proteste, në orën 12:00, para godinës së Fokus Media Group, e cila përfshin televizionin News24.
Po ashtu, i bëhet thirrje Këshillit të Ministrave, Policisë së Shtetit dhe Ministrisë së Mbrojtjes të sqarojnë me dokumente pozicionet e tyre dhe bazën ligjore të këtij veprimi ekstrem.
Të nderuar kolegë, aktivistë dhe qytetarë,
Fikja e sinjalit të News24 dhe rrethimi me forca policie i redaksive të News24, Gazeta Panorama, Gazeta Shqiptare dhe Balkanweb është një alarm i fortë për gjendjen e demokracisë dhe lirisë së medias në Shqipëri.
Ky nuk është thjesht një konflikt mes një institucioni dhe një kompanie, ky është një akt i rëndë që prek të drejtën e qytetarëve për t’u informuar dhe i dërgon një mesazh frikësues çdo gazetari.
I bëjmë thirrje urgjente Këshillit të Ministrave, Policisë së Shtetit dhe Ministrisë së Mbrojtjes të sqarojnë me dokumente pozicionet e tyre dhe bazën ligjore të këtij veprimi ekstrem. Heshtja nuk është opsion.
Në shenjë solidariteti me kolegët tanë dhe në mbrojtje të fjalës së lirë, ftojmë gazetarë, organizata dhe çdo qytetar që beson në demokraci të bashkohen me ne në protestë:
E hënë, 11 gusht 2025
Ora 12:00
Përpara godinës së Fokus Media Group
Demokracia vdes në errësirë.
