Një incident i rëndë është shënuar në rrugën “Ali Bushi” në Tiranë, ku një fëmijë 5-vjeçar është kafshuar nga një qen që ndodhej në pronësi të një 61-vjeçari.
Sipas njoftimit zyrtar të Policisë, ngjarja ka ndodhur kur i mituri ka hyrë në oborrin e banesës së shtetasit A. A., 61 vjeç, ku ndodhej edhe kafsha. Si pasojë, fëmija është sulmuar nga qeni dhe është transportuar menjëherë në spital, ku po merr trajtim mjekësor.
Specialistët për Hetimin e Krimeve pranë Komisariatit të Policisë Nr. 4 kanë referuar materialet në Prokurori dhe kanë nisur procedim penal në gjendje të lirë ndaj 61-vjeçarit.
Policia nuk ka dhënë detaje të mëtejshme mbi gjendjen shëndetësore të fëmijës, ndërsa hetimet vazhdojnë për të zbardhur plotësisht rrethanat e ngjarjes.
