Pamjet shqetësuese të publikuara nga Genard Hajdini në rrjetet sociale, ku shfaqej motra e tij Sonida Hajdini e shtrirë në krevat dhe pjesërisht e zhveshur, kanë sjellë reagimin e Ministrisë së Shëndetësisë dhe institucioneve përkatëse.
Pas publikimit të videos, strukturat sociale të Njësisë Administrative nr. 2, së bashku me mjekët e Qendrës Shëndetësore dhe policinë, ndërhynë për të vlerësuar gjendjen e Sonida Hajdinit.
Nga verifikimet rezultoi se videoja ishte publikuar për të tërhequr vëmendje në rrjetet sociale dhe jo për ushtrim dhune, ndërsa pamjet u fshinë menjëherë pas ndërhyrjes së policisë.
Strukturat shëndetësore siguruan trajtimin mjekësor të nevojshëm, pasi Sonida Hajdini kishte qenë më parë e shtruar në Spitalin e Shëndetit Mendor dhe ishte lënë për trajtim ambulator. Aktualisht, vëlla e motër ndodhen të shtruar në spitalin psikiatrik të Tiranës për trajtim më të specializuar.
Ndërkohë, materialet për këtë rast janë referuar në prokurori, ndërsa institucionet sociale do të hartojnë një plan masash për monitorimin e vazhdueshëm të dy personave, për shkak të dyshimeve për shfrytëzim të një personi me aftësi ndryshe.
Kujtojmë se pas publikimit të videos një ditë më parë, qytetarë të shumtë dhe personazhe të njohur në internet, u bënë thirrje institucioneve shtetërore të marrin nën kujdes vëlla e motër, të cilët prej disa javësh janë në kushte të rënduara për shkak të humbjes së babait. Genardi, ditët e fundit ka bërë thirrje edhe për ndihma ushqimore, pasi derisa i ati, Paqësori ishte gjallë, merrnin ushqime nga Kisha.
Reagimi i Ministrisë së Shëndetësisë:
Pas publikimit në faqen e Instagram-it të shtetasit G.H., ku shfaqej në mënyrë të papërshtatshme motra e tij, shtetasja S.H., menjëherë nga strukturat sociale vendore të Njësisë Administrative nr. 2, së bashku me stafin mjekësor të Qendrës Shëndetësore nr. 1 dhe oficerët e policisë të Komisariatit nr. 1, u bë vlerësimi i gjendjes së shtetases S.H.
Gjatë intervistimit, u shpreh se videoja kishte si qëllim ndjekjen virale të vetë personazhit dhe jo elementë dhune apo qëllime dashakeqësie. Videoja është fshirë nga vetë G.H., pas urdhrit të menjëhershëm të policisë.
Strukturat shëndetësore bënë gjithashtu të mundur edhe injektimin e medikamenteve shëndetësore, pasi nga qëndrimi para dy javësh në Spitalin e Shëndetit Mendor në Tiranë, ishte lënë përgjegjësi për trajtim ambulator, i cili ofrohej nga një kujdestare e vendosur nga të afërmit e dy personave.
Aktualisht, ata ndodhen të shtruar për një shërbim më të specializuar mjekësor në spitalin psikiatrik të Tiranës, ndërsa nga ana e organeve kompetente materialet janë referuar në prokurori, sipas edhe rekomandimit tonë.
Struktura e NJNVR-së së Njësisë nr. 2, së bashku me Drejtorinë e Mbrojtjes Sociale në Bashkinë e Tiranës dhe Drejtorinë Rajonale të Shërbimit Social Shtetëror të Qarkut Tiranë, do të mblidhen për hartimin e planit të masave për monitorimin e vazhdueshëm të dy personave me lidhje gjaku (motër dhe vëlla), ku do të kërkohet edhe mbështetje nga organet kompetente për hetime të mëtejshme, për shkak të dyshimit për konsumimin e veprës penale të shfrytëzimit të një personi me aftësi ndryshe.
o
