Robert Prevost, kardinali nga Çikago, SHBA u zgjodh ditën e djeshme Papa i ri. Ai do të njihet si Leo XIV.
Në mesazhin e tij të pare Papa foli për paqe.
Emri i primatit të ri të Kishës Katolike Romake, i cili i përket rendit Augustinian, ka një histori të gjatë në Kishën Katolike.
Leo i parë dhe të tjerët
Leo I – i njohur edhe si Leo i Madh, ishte kreu i Kishës Katolike Romake nga viti 440 deri në vitin 461. Ai kishte edhe nofkën “Doktor i Kishës” dhe pati guximin në vitin 452 të takohej personalisht me Atilën për të parandaluar pushtimin e Romës nga hordhitë e këtij të fundit.
Leo II – Ai u bë i njohur si “Pontifi i shkurtër” pasi qëndroi në detyrë nga viti 682 deri në vitin 683 dhe është njeriu që ratifikoi rezultatin e Sinodit të Tretë të Kostandinopojës.
Leo III 795–816 – Leo III është Papa që i dha Karlit të Madh titullin Perandor i Perandorisë së Shenjtë Romake me anë të një vule papnore në vitin 800 dhe e transformoi atë nga një ushtar, gjeneral dhe luftëtar në një figurë politike për botën evropiane të kohës. Karli i Madh ia ktheu “favorin” duke i ofruar mbrojtje Leos nga kundërshtarët e tij dhe, nëpërmjet vendimeve të tij, tokat papnore në gadishullin italian u rritën ndjeshëm.
Leo IV 847–855 – Vepra e tij e rëndësishme është fortifikimi i qytetit të Romës dhe lufta që ai shpalli kundër piratëve saraçenë.
Leo V 903 -Papati i dytë më i shkurtër. Leo V qëndroi në fronin papnor vetëm për një muaj.
Leo VI 928 – Pak dihet për Leon VI, i cili gjithashtu pati një qëndrim shumë të shkurtër në krye të kishës katolike.
Leo VII 936–939 – Kampion i përulësisë. Ai luajti një rol të rëndësishëm në Paqen me Hungarinë.
Leo VIII 963–965 – Për disa, ai nuk konsiderohet Papë, por ishte kreu i doktrinës katolike për dy vjet.
Leo IX (Shën Leo IX) 1049–1054 – Shenjti i dytë në listën e gjatë të Primatëve të Kishës Katolike që zgjodhën këtë emër të veçantë. Ai ishte një nga reformatorët strukturorë të doktrinës katolike dhe konsiderohet njeriu që nisi proceset që sollën Skizmin midis Kishave Lindore dhe Perëndimore.
Leo X 1513–1521 – Papë nga familja Medici, e përjashtoi Martin Luterin, mbikëqyri periudhën e hershme të Reformimit.
Leo XI – Prill 1605 (27 ditë) – I njohur si “Papa Vetëtima” për shkak të papatit të tij jashtëzakonisht të shkurtër. Ai qëndroi në fronin papnor më pak se paraardhësi i tij i largët Leo V.
Leo XII – 1823–1829 – Papë konservator, kundërshtoi liberalizmin modern.
Leo XIII – 1878–1903 – Një mbrojtës i flaktë i të dobëtëve dhe punëtorëve. Për shumë njerëz, ai ka mbetur në histori si i vetmi “Papë komunist”.
Rruga e Papës së ri nuk do të përcaktohet nga emri që ai zgjedh, por është e ditur se zgjedhja e emrit nga secili Papë është një referencë specifike për të kaluarën kishtare katolike dhe një “shënim në fund të faqes” për rrugën që ai do të zgjedhë të ndjekë.
Në listën e gjatë të “Leo-ve”, Papa i ri ka shembuj si brilantë, ashtu edhe jashtëzakonisht “të errët”. Mbeten për tu parë qëllimet dhe bindjet e tij përmes udhëtimit të tij.
