Kryeministri Edi Rama pritet t’i dërgojë Presidentit Bajram Begaj dekretet për ministrat e rinj, të shpallur më 11 shtator gjatë Asamblesë së Partisë Socialiste. Ndërkohë, java që vjen pritet të jetë tejet e ngarkuar dhe tensionuar për Kuvendin e Shqipërisë.
Të hënën, kryetari i sapozgjedhur i Kuvendit, Niko Peleshi, do të thërrasë një mbledhje me kryetarët e grupeve parlamentare, ku do t’u kërkojë emrat për përbërjen e kryesive dhe anëtarësisë e komisioneve dhe përbërjen e organeve të tjera si Byroja apo delegacionet.
Ndërsa, të martën është parashikuar një seancë plenare për votimin e anëtarësë së komisioneve. Po ashtu, do të shqyrtohen me procedurë të përshpejtuar ndryshimet në Rregulloren e Kuvendit, përfshirë dhe skemën e re të komisioneve parlamentare.
Në seancën e paradites, pritet të ngrihet Këshilli për Rregulloren dhe Mandatet. Më pas, gjatë ditës këshilli do kalojë rregulloren e re, e cila do të votohet në një seancë të dytë të martën pasdite. Deri atëherë, pritet të jetë depozituar në Kuvend programi i qeverisë dhe dekretet për kabinetin e ri qeveritar nga ana e kryeministrit Rama.
Të mërkurën, kryetari Peleshi do të mbledhë Konferencën e Kryetarëve, ku do të vendoset koha e debatit për qeverin dhe programin.
Ndërkohë të enjten dhe të premten Kuvendi pritet të zhvillojë një seancë maratonë debati për programin qeverisës dhe ministrat e rinj, ndërsa të premten pasdite parashikohet edhe ceremonia e betimit të qeverisë së re pranë Presidentit Begaj.
Seanca e parë plenare e Parlamentit të ri u zhvillua ditën e djeshme në dy faza. Gjatë paradites, në orën 10:00, seanca u duk se nisi aty ku kishte mbetur legjislatura e kaluar. Kryetari i PD-së, Sali Berisha, mori fjalën jashtë rendit të ditës dhe bllokoi foltoren, ku ai u rrethuar nga Garda.
Deputetët demokratë vendosën në foltore pankarta me figura të njohura të botës së krimit, ndërsa Gazment Bardhi ndërhyri duke dëmtuar mikrofonin e Taulant Ballës.
“Nuk lexoji emra të Bajrave, e Pëllumb Gjokës, nuk lexoi emrat e partisë së vërtetë, të krimit. Lexoji Lubi Ballukun…”, – tha Berisha.
Seanca e parë zgjati vetëm 24 minuta dhe u pasua nga tensione të shumta. Ajo u ndoq nga përfaqësues diplomatik të vendit tonë, përfshirë të dërguarën e SHBA në Shqipëri, Nancy VanHorn, si dhe përfaqësues të komuniteteve fetare. Në sallë ranë në sy karriget bosh të përfaqësuesve të SPAK dhe Prokurorisë së Përgjithshme.
