Një javë pas vrasjes së rëndë të 14-vjeçarit Martin Cani pranë shkollës 9-vjeçare “Fan Noli” në Tiranë, qindra qytetarë, mësues, prindër dhe përfaqësues të shoqërisë civile janë mbledhur përballë Ministrisë së Arsimit në protestën e dytë, duke kërkuar masa të menjëhershme për sigurinë e fëmijëve në shkolla.
Protestuesit, me pankarta në duar dhe me lot në sy, kërkojnë dorëheqjen e ministres së Arsimit, duke e cilësuar atë dhe institucionin që drejton si përgjegjës për mungesën e masave mbrojtëse që çuan në këtë tragjedi. Ata gjithashtu kanë bërë thirrje për rritjen e buxhetit për arsimin dhe për një qasje më të sigurt dhe më të përgjegjshme ndaj jetës dhe edukimit të fëmijëve.
Mes protestuesve ishte edhe motra e Egli Pogës, i riu që humbi jetën pas dhunës nga një bashkëmoshatar pak muaj më parë në Pogradec. Në fjalën e saj, ajo i bëri apel nënës së autorit të vrasjes së Martinit që të dalë publikisht dhe të flasë, duke theksuar përgjegjësinë e të gjithëve në edukimin dhe mbrojtjen e fëmijëve.
Ngjarja tragjike e vrasjes së Martinit nga bashkëmoshatari i tij, i mituri me inicialet M.P., ka tronditur opinionin publik dhe ka nxitur një debat të gjerë për sigurinë në institucionet arsimore, me kërkesa për masa të forta që të shmangen ngjarje të tilla në të ardhmen.
