Ministrja për Europën dhe Punët e Jashtme, Elisa Spiropali, ka shprehur shqetësimin për situatën në Dhomat e Specializuara në Hagë, ku Prokuroria ka paraqitur propozime dënimi për ish-drejtuesit e Ushtrisë Çlirimtare të Kosovës, përfshirë Hashim Thaçin dhe Kadri Veselin. Ajo theksoi se paraburgimi ka kaluar pesë vjet pa një vendim përfundimtar dhe se natyra e akuzave ngrin pyetje mbi standardet e procesit të rregullt ligjor dhe respektimin e të drejtave të njeriut.
Spiropali nënvizoi se kjo situatë krijon perceptimin e njëanshmërisë në trajtimin e këtij rasti, veçanërisht në krahasim me trajtimin e përgjegjësve të regjimit serb, ku shumë krime mbeten të patrajtuara. Pabarazia në ndjekjen e drejtësisë është një rrezik për standarde të dyfishta dhe për besimin e publikut në drejtësinë ndërkombëtare.
Ministrja theksoi se drejtësia ndërkombëtare duhet të jetë e paanshme, e balancuar dhe të mbështetet në prova të pakontestueshme, pa krijuar perceptimin e trajtimeve selektive. Një drejtësi e perceptuar si e njëanshme mund të minojë besimin publik dhe të komplikojë proceset e pajtimit në një rajon që ka nevojë për stabilitet.
Spiropali gjithashtu theksoi rëndësinë e dallimit midis përgjegjësisë individuale penale dhe karakterit historik të luftës për liri. Ajo kërkoi që procesi gjyqësor të respektojë dinjitetin e atyre që luftuan për liri dhe të garantojë që gjuha dhe qasja e Prokurorisë të mos prekin padrejtësisht historinë e luftës.
Shqipëria riafirmon se drejtësia duhet të ndihmojë në zbulimin e së vërtetës dhe në pajtim, dhe se procedurat gjyqësore duhet të përfundojnë brenda një afati të arsyeshëm, në përputhje me standardet ndërkombëtare. E ardhmja e Kosovës dhe stabiliteti rajonit varen nga një sistem i besueshëm drejtësie që mbështet paqen. Shqipëria do të vazhdojë të monitorojë këtë proces me përkushtim ndaj vlerave të drejtësisë ndërkombëtare.
