Endrit Thaçi, djali i ish presidentit të Kosovës Hashim Thaçi, ka bërë thirrje publike për marshim për drejtësi, në kohën kur në Hagë ka nisur faza përmbyllëse e procesit gjyqësor ndaj ish-krerëve të UÇK-së.
Thirrja është bërë përmes një postimi në rrjetet sociale, ku Thaçi ka shpërndarë një poster me mbishkrimin “Drejtësi, jo politikë”, duke ftuar qytetarët të marrin pjesë në marshimin e paralajmëruar më 17 shkurt, në ora 14:00, në Sheshin Skënderbeu në Prishtinë.
Marshimi pritet të mbahet në Ditën e Pavarësisë së Kosovës dhe, sipas thirrjes së publikuar, synon të kërkojë drejtësi dhe të kundërshtojë politizimin e procesit gjyqësor ndaj ish-krerëve të UÇK-së.
Në poster shfaqet edhe slogani “Liria ka emër”, si dhe simboli i UÇK-së. Thirrja vjen pas kërkesës së Prokurorisë së Dhomave të Specializuara në Hagë, e cila ka kërkuar dënim prej 45 vjetësh burg për secilin nga ish-udhëheqësit e UÇK-së: Hashim Thaçi, Kadri Veseli, Jakup Krasniqi dhe Rexhep Selimi.
