Sidorel Prendi, dyshohej se ishte përfshirë në armiqësi të shumta me personazhe të njohur të botës së krimit në Kurbin, Lezhë dhe Fushë-Krujë. Një pjesë e këtyre përplasjeve lidhen për territor, borxhe të mëdha, apo pazare të prishura.
“Krimi i Organizuar, është i përfshirë në trafikun e drogës në Shqipëri dhe më gjerë, pasi për të kryer ato krime dhe për ti fshehur ato kërkohet para dhe nëpërmjet narkotikëve sigurohen mjetet e duhura për të arritur më pas që të mbulohen edhe krimet e vrasjes apo hakmarrjes për të eliminuar grupet e ngjashme’-u shpreh Dea Toçi, avokate.
“Kemi të bëjmë me personazhe që janë shumë individualist, diku individualiteti i këtyre personazheve, do dali dhe kam përshtypjen që në këtë rast Rohan Ibrahimi, ka dashur të jetë ndryshe”- u shpreh Xhevahir Zhabina, gazetar.
Sidorel Prendi, i lindur më 14 mars të vitit 1992 në fshatin Pllanë të Lezhës, me rrënjë familjare në Krujë, ishte një emër mjaft i njohur për policinë. Shtatorin e vitit 2014, ai u bë shënjestra e një grupi të strukturuar kriminal nga Mirdita. Shtatë persona planifikuan ta rrëmbenin dhe ta ekzekutonin, por falë reagimit të policisë, e cila nën drejtimin e ish Prokurorisë për Krime të Rënda, ndërhyri në kohë duke arrestuar personat e përfshirë.
Operacioni u zhvillua në aksin Lezhë–Kurbin, atje ku atentatorët kishin vënë në shënjestër makinën e Sidorel Prendit. Për dy javë, Sidorel Prendi u ndoq në Tiranë dhe Lezhë. Objektivi ishte i qartë: eliminimi i tij. Në atë kohë 22 vjeç, “Sidi” nuk ishte thjesht viktimë e një konflikti banal, por shënjestër e një urdhri të mirëorganizuar.
“Është person që është përfolur si pjesëmarrës apo organizator dhe financues i disa ngjarjeve kriminale, ku janë ekzekutuar personazhe të rëndësishëm të botës së krimit të zonës së Lezhës, Kurbinit e Fushë-Krujës, dhe është person që ka pasur hasmëritë e tij’- u shpreh avokati, Alban Qafa.
“Këtu është bërë një kongomleat dhe një rreth vicioz që mund të dënohen shumë persona, mund të nisin shumë procedime apo persona mund të merren të pandehur, por është shumë e vështirë që të ndërpritet zinxhiri i gjakmarrjeve, pasi tanimë gjakmarrja që në fakt edhe me kanun kjo nuk është gjakmarrje, sepse nuk mund të vrasës tjetrin me dorën e botës, gjakmarrje është tjetër gjë’-u shpreh avokati, Ermal Hamataj.
Pas tentativës për tu marrë peng dhe eliminuar, Prendi krijoi lidhje duke vepruar për llogari të disa grupeve kriminale. Për shkak të një borxhi, në vitin 2020 ai u fut në një konflikt të hapur me Ervis Martinaj, që në atë periudhë konsiderohej si “Mbreti i lojërave të fatit”.
Në botën e errët të krimit, marrëveshjet nuk bëhen me letër. Ato vulosen me fjalë, garantohet me fytyrë dhe, kur prishet fjala, nuk ka kthim pas. Historia e përplasjes mes Sidorel Prendit dhe Ervis Martinajt është rrëfimi i një tradhtie të prerë në besë, e kthyer më pas në një luftë pa kthim.
“Ne kemi diskutuar për informacione të cilat i kemi me burime nuk kemi mundësi ti verifikojmë duke përdorur dokumente apo duke aksesuar këto dokumente. Konflikti ka qenë i ashpër mes të dyve në fillim, sigurisht më pas ka filluar i gjithë zinxhiri i vrasjeve”-u shpreh gazetari Xhevahir Zhabina.
