Presidentja e Meksikës, Claudia Sheinbaum, ka njoftuar se do të ngrejë akuza ligjore ndaj një burri që e ngacmoi seksualisht gjatë një dalje publike në Mexico City.
Ngjarja ndodhi të martën pranë Pallatit Kombëtar, ku Sheinbaum ishte duke përshëndetur qytetarët. Një video e shpërndarë gjerësisht në rrjetet sociale tregon momentin kur burri afrohet dhe përpiqet ta puthë presidenten, e cila tërhiqet menjëherë. Stafi i saj reagoi menjëherë, ndërsa autori u arrestua nga policia.
Në një konferencë për shtyp, Sheinbaum bëri të ditur se kishte marrë informacione se i njëjti burrë kishte ngacmuar edhe gra të tjera në turmë. Ajo theksoi se vendimi për të ngritur padi ishte i domosdoshëm, jo vetëm për veten e saj, por për të gjitha gratë në vend.
“Nëse e bëjnë këtë ndaj presidentes, imagjinoni çfarë ndodh me gratë e zakonshme,”
deklaroi Sheinbaum, duke kërkuar që ngacmimet seksuale të trajtohen me tolerancë zero në të gjitha nivelet e shoqërisë.
Incidenti ka shkaktuar reagime të forta nga organizatat për të drejtat e grave, të cilat e kanë cilësuar rastin si një shembull të qartë të kulturës së machismo-s – një fenomen i rrënjosur thellë në Meksikë, që ushqen ndjenjën e mosndëshkueshmërisë ndaj dhunës dhe ngacmimeve ndaj grave.
Meksika përballet me një krizë të thellë të dhunës me bazë gjinore, ku rreth 98% e vrasjeve të grave mbeten të pandëshkuara, sipas organizatave lokale.
Sheinbaum, e cila gjatë fushatës kishte premtuar masa të forta kundër femicidit dhe ngacmimeve, ende nuk ka arritur të tregojë përmirësime të dukshme në këtë drejtim. Ngjarja ndodhi në një moment kur debatet për sigurinë e zyrtarëve publikë janë shtuar, veçanërisht pas vrasjes së një kryetari bashkie gjatë festimeve të “Ditës së të Vdekurve.”
Megjithatë, presidentja ka theksuar se nuk do të ndryshojë stilin e saj të afërt me qytetarët, pavarësisht rreziqeve që sjellin këto takime, duke nënvizuar se “afërsia me popullin është pjesë thelbësore e udhëheqjes sime.”
