Presidenti i Serbisë, Aleksandar Vuçiç, gjatë një interviste në Radio-Televizionin e Serbisë, pati një përplasje me moderatoren rreth vizitës së kancelarit të Austrisë, Christian Stocker.
Sipas mediave në Serbi, Stocker kishte ardhur në Beograd për t’i përcjellë Vuçiçit mesazhin se Bashkimi Europian nuk është i kënaqur me qëndrimin e tij ndaj protestave. Kur moderatorja e RTS-it iu referua kësaj, Vuçiç i cilësoi këto media ‘okupues.’
Moderatorja komentoi shkurt se ‘atë e thotë ai, e jo ajo’, gjë që u bë shkas për presidentin serb që të kritikonte edhe vetë RTS-in, televizionin publik në Serbi. Në pjesën tjetër të intervistës, Vuçiç përsëriti narrativin tashmë të njohur se protestat ‘po organizohen nga Perëndimi’ dhe se policia në Serbi është ‘jashtëzakonisht e durueshme’, pavarësisht pamjeve që tregojnë rrahje brutale të protestuesve në gjithë vendin gjatë ditëve të fundit.
Protestat në shtetin serb kanë nisur disa muaj pas tragjedisë në Novi Sad, ku mbetën të vdekur 14 persona pas rënies së një pjese të çatisë në stacionin hekurudhor. Protestuesit kërkojnë largimin e Vuçiçit nga drejtimi i vendit dhe zgjedhje të reja.
