Presidenti i Ukrainës, Volodymyr Zelensky tha sot se është i gatshëm të heqë dorë nga posti i tij nëse kjo do të kontribuonte në arritjen e paqes për Ukrainën. Ai shtoi gjithashtu se do të ishte i gatshëm ta bëjë këtë në këmbim të pranimit të Ukrainës në NATO.
Zelensky theksoi se dëshironte që presidenti amerikan, Donald Trump, ta shihte si një partner të Ukrainës, dhe jo vetëm si ndërmjetës ndërmjet Kievit dhe Moskës. “Dua më shumë se thjesht një ndërmjetësim… kjo nuk mjafton,” deklaroi ai në një konferencë për mediat në Kiev.
Gjatë konferencës, Zelensky, i cili u zgjodh në maj të vitit 2019, u pyet nëse do të ishte i gatshëm të linte presidencën për paqen në Ukrainë. Ai u përgjigj: “Po, do të isha i lumtur, nëse do të ishte për paqen e Ukrainës.” Më tej shtoi: “Nëse duhet të largohem nga kjo tavolinë, jam i gatshëm ta bëj dhe mund ta shkëmbej këtë për anëtarësimin në NATO.”
Komentet e presidentit ukrainas vijnë pas një deklarate të homologut të tij amerikan, i cili e cilësoi Zelenskyn “diktator pa zgjedhje” më herët gjatë kësaj jave. Sipas ligjit ukrainas, zgjedhjet janë të ndaluara gjatë periudhës së ligjit të luftës, që është shpallur që nga fillimi i pushtimit të Rusisë në shkurt të vitit 2022.
