Pas më shumë se katër ditësh kërkimesh intensive, sot është gjetur pa jetë 27-vjeçari Ajet Lleshi, banor i fshatit Kishaj në Has, i cili kishte humbur kontaktet me familjen që prej mëngjesit të datës 6 prill.
Lleshi ishte shpallur i zhdukur një ditë pas largimit nga banesa për të prerë dru në pyll, nga ku nuk u kthye më. Menjëherë pas kallëzimit të bërë nga familjarët, Policia nisi operacionin e kërkimit në bashkëpunim me Grupin e Kërkim-Shpëtimit të Kosovës, Policinë Kufitare, Emergjencën Civile, si dhe me ndihmën e banorëve të zonës.
Kërkimet u përqendruan në një terren të vështirë malor mes fshatrave Kishaj dhe Cahan. Si rezultat, trupi i pajetë i 27-vjeçarit u gjet në një zonë të pyllëzuar.
Grupi hetimor, nën drejtimin e Prokurorisë, ka nisur hetimet për të përcaktuar shkaqet e vdekjes dhe për të dokumentuar zyrtarisht rastin.
Njoftimi i policisë:
Në vijim të informacionit të dhënë më date 07.04.2025, për humbjen e kontakteve të shtetasit A.Ll., 27 vjeç me familjaret e tij, ju informojmë se:
Si rezultat i kërkimeve të pandërprera të kryera nga Shërbimet e Policisë në bashkëpunim me Grupin e Kërkim-Shpëtimit të ardhur nga Kosova, Policinë Kufitare, Emergjencën Civile, banorët e zonës dhe familjarët e 27 vjeçarit, është bërë e mundur gjetja e trupit të pajetë të 27 vjeçarit, në një zonë të pyllëzuar malore mes fshatrave Kishaj dhe Cahan.
Grupi hetimor nën drejtimin e Prokurorisë vijon punën për përcaktimin e shkakut të humbjes së jetës së 27 vjeçarit dhe dokumentimit ligjor të rastit.
