Efektivi i Policisë i cili mbrëmjen e së dielës ndodhej pikërisht brenda ambienteve të berberhanës ku dhe u qëllua me breshëri plumbash ka dhënë dëshminë e tij para hetuesve.
Burime për mediat bëjnë me dije se efektivi, identiteti i të cilit ende nuk është bërë me dije për mediat, ka treguar se ndodhej rastësisht në berberhanën e Sokol Dacit dhe se në momentin kur në drejtim të saj u qëllua me breshëri plumbash ai po ashtu iu kundërpërgjigj me qëllim neutralizimin e autorëve.
“Qëllova me armë për të neutralizuar autorët”, mësohet të ketë thënë ndër të tjera efektivi. Policia e Lezhës një natë më parë bëri me dije se ngjarja u regjistrua rreth orës 21:00 në qendër të fshatit Rrilë të Lezhës.
Në drejtim të berberhanës së Dacit, i njohur ndryshe si “Berber Coli”, u qëllua me breshëri plumbash. Si pasojë mbeti i plagosur me katër plumba vetë Daci, ndërkohë që burime për mediat bëjnë me dije se një plumb ka marrë edhe nipi i Nikulajve, identiteti i të cilit deri më tani nuk dihet.
Deri më tani, autoritetet kanë konfirmuar vetëm plagosjen e pronarit të biznesit, ndërkohë që sa i përket plagosjes së nipit të Nikulajve, i cili dyshohet të ketë qenë dhe shënjestra e atentatorëve, nuk ka një reagim.
