Një ngjarje e pazakontë është regjistruar në Meksikë, ku përdorimi i tepruar i filtrave në rrjetet sociale komplikoi identifikimin e një vajze, e cila ishte raportuar e zhdukur. Bëhet fjalë për Grecia Guadalupe Orantes Mendoza, e cila ishte shpallur e humbur nga familjarët që prej datës 12 prill.
Rasti ndodhi në shtetin Chiapas, ku autoritetet aktivizuan protokollin zyrtar të kërkimit, “Protocolo Alba” dhe publikuan një fletë kërkimi të përgatitur nga Prokuroria e Përgjithshme e Shtetit. Megjithatë, kërkimi u vështirësua pasi fotot e marra nga rrjetet sociale të 30-vjeçares nuk i ngjanin aspak pamjes së saj reale.
Për shkak të filtrave të shumtë, që ajo përdorte në rrjetet sociale, ndryshimi ishte drastik dhe e bëri më të vështirë identifikimin nga qytetarët. Pas një operacioni të koordinuar nga policia dhe institucionet e sigurisë lokale, e reja u gjet tre ditë më vonë, në segmentin rrugor Ocozocoautla–Jiquipilas, e gjallë dhe pa dëmtime.
Autoritetet bënë të ditur se ajo mori menjëherë ndihmë mjekësore dhe më pas u dërgua pranë Ministrisë Publike për të dhënë deklarimin e saj. Deri tani nuk raportohet për shenja dhune, ndërsa hetimet vijojnë për të sqaruar rrethanat e zhdukjes dhe rikthimit të saj.
