Policia e Dibërs ka njoftuar suksesin e arritur në ardhjen në ndihmë të 7 personave që rrezikonin mbytjen në ujërat e lumit Drin të Zi.
Në njoftimin e policisë thuhet:
Bulqizë
Policia iu vjen në ndihmë 7 qytetarëve që kishin mbetur të bllokuar në rrjedhën e lumit Drini i Zi.
Shërbimet e Komisariatit të Policisë Bulqizë, menjëherë pas marrjes së njoftimit nga një shtetas, i cili kërkoi ndihmë pasi ai dhe 6 familjarë të tij kishin mbetur të bllokuar në rrjedhën e lumit Drini i Zi, në vendin e quajtur “Ura e Gjoricës”, si pasojë e rritjes së menjëhershme të nivelit të ujit, organizuan menjëherë punën dhe shkuan në vendngjarje.
Në bashkëpunim me shërbimet e Emergjencave Civile të Prefekturës Dibër dhe ekipin e shërbimit zjarrfikës, u organizua operacioni i shpëtimit, gjatë të cilit 7 qytetarët u nxorën nga rrjedha e ujit me gomone.
Të shtatë qytetarët janë në gjendje të mirë shëndetësore.
Policia e Dibrës mbetet maksimalisht e angazhuar në shërbim të qytetarëve dhe apelon për tregimin e kujdesit maksimal gjatë qëndrimit pranë lumenjve dhe zonave ujore, si dhe për njoftimin në kohë të Policisë, në çdo rast nevoje, në numrin pa pagesë 112.
