Të paktën 30 palestinezë u vranë pas të shtënave me armë zjarri nga ushtria izraelite teksa prisnin ndihmë humanitare në Gazën veriore të mërkurën, sipas agjencisë së mbrojtjes civile të drejtuar nga Hamasi.
Një zëdhënës i mbrojtjes civile të Gazës i tha agjencisë së lajmeve AFP se të paktën 300 persona të tjerë u plagosën.
Izraeli tha se detajet e incidentit “po shqyrtohen ende”, raporton BBC.
Forcat Mbrojtëse Izraelite (IDF) thanë se “hapën zjarr” pasi banorët e Gazës u mblodhën rreth kamionëve me ndihma 3 km në jugperëndim të pikës kalimtare të Zikim, por ata “nuk kishin dijeni për viktima”.
Sipas zyrës së OKB-së për të drejtat e njeriut, më shumë se 1,000 palestinezë janë vrarë nga ushtria izraelite ndërsa përpiqeshin të merrnin ndihmë ushqimore që nga fundi i majit.
Më shumë se 150 njerëz kanë vdekur nga kequshqyerja që nga fillimi i luftës Izrael-Hamas në vitin 2023, përfshirë 89 fëmijë, thotë ministria e Shëndetësisë e Gazës e drejtuar nga Hamasi.
Kjo vjen ndërsa një grup ekspertësh globalë të sigurisë ushqimore të mbështetur nga OKB-ja paralajmëruan se “skenari më i keq i urisë po zhvillohet aktualisht” në Gaza, pavarësisht se Izraeli këtë javë njoftoi një seri pauzash në operacionet ushtarake për të lejuar ndihmën në territor.
Izraeli thotë se nuk po vendos kufizime për ndihmën që hyn në Gaza, pretendime të hedhura poshtë nga disa vende evropiane dhe OKB-ja.
