Barazimi 1-1 i Manchester United në “London Stadium” kundër West Ham la një shije të çuditshme: jo vetëm që u ndal seria e katër fitoreve radhazi, por u shty sërish edhe “sfida” virale e tifozit Frank Ilett (i njohur si “The United Strand”), i cili ka premtuar se nuk do t’i presë flokët derisa United të fitojë pesë ndeshje rresht.
United u përball me një West Ham të organizuar dhe të vështirë për t’u thyer, por shmangu humbjen falë një goli në minutat shtesë nga Benjamin Sesko, i futur nga stoli. Pas ndeshjes, Ilett pranoi zhgënjimin që sfida po zgjatet, por theksoi se për të rëndësi ka bamirësia: “Sa më gjatë të zgjasë, aq më mirë për bamirësinë”, duke insistuar që fokusi të jetë te fondet që po mblidhen, jo te “qethja”.
Megjithatë, historia ka ndezur debat edhe te legjendat e klubit. Wayne Rooney u shpreh i irrituar në podcastin “No Tippy Tappy Football”, duke thënë se kjo anekdotë po e mbulon analizën sportive: “Do ta dërgoja në anën tjetër të vendit. Po më çmend. Po flasim për Carrick dhe United që kërkojnë fitoren e pestë radhazi, dhe gjithçka sillet rreth këtij djali që do të presë flokët. Bëj bast që do të mërzitet nëse United fiton, sepse s’do të jetë më relevant.”
Pas barazimit, batutat vazhduan edhe nga Michail Antonio, komentator i TNT dhe ish-lojtar i West Ham, i cili i tha me shaka se tani “nuk do ta marrë qethjen”, por shtoi se United mbetet ndër skuadrat më në formë dhe ka shanse të mira për top-4. Ndërkohë, Michael Carrick preferoi të flasë për futbollin: pranoi se skuadra nuk ishte në nivelin e ndeshjeve të fundit dhe i mungoi qartësia për të çarë mbrojtjen, por vlerësoi karakterin dhe besimin deri në fund.
