Seanca e fundit e diskutimit për buxhetin shtetëror në Kuvendin e Turqisë u shënua nga tensione të forta dhe përleshje fizike mes deputetëve të partisë në pushtet, AKP, dhe opozitës kryesore, CHP. Incidenti ndodhi gjatë votimit të buxhetit dhe zgjati rreth dhjetë minuta, duke detyruar kryetarin e Kuvendit të pezullojë përkohësisht seancën, pasi forcat e sigurisë patën vështirësi të ndërhynin.
Përplasja nisi pas një debati verbal mes deputetit të AKP-së nga Bursa, Mustafa Varank, dhe nënkryetarit të grupit parlamentar të CHP-së, Gökhan Günaydın. Varank sulmoi drejtuesit e CHP-së nga foltorja, duke bërë deklarata provokuese ndaj kryetarit të partisë, Özgür Özel, çka shkaktoi reagime të ashpra nga opozita.
Situata u përshkallëzua kur deputetë të tjerë të CHP-së u ngritën për të protestuar, duke kaluar nga fjalët në shtyrje dhe më pas në grushte mes përfaqësuesve të dy palëve. Shumë deputetë u mblodhën në qendër të sallës, ndërsa sigurimi dhe ligjvënës të tjerë u përpoqën t’i ndanin.
Pavarësisht kaosit, pas rifillimit të seancës Kuvendi miratoi Buxhetin Qendror të Qeverisë për vitin 2026, si dhe ligjin për llogaritjen përfundimtare të buxhetit të vitit 2024, me shumicë votash.
