Policia e Tiranës ka arrestuar një 51-vjeçar, i cili gjatë një konflikti për motive të dobëta goditi me thikë një 48-vjeçar.
Policia bën me dije se i arrestuari, Ronald Lacej rezulton me precedent penalë për vrasje dhe për vepra të tjera penale.
“Shërbimet e Komisariatit të Policisë Nr. 4, në bashkëpunim me shërbimet e Forcës së Posaçme “Shqiponja”, dje, pas marrjes së njoftimit se në Rrugën e Dibrës, një shtetas ishte plagosur me mjet prerës, kanë shkuar menjëherë në vendngjarje, me qëllim kapjen e autorit dhe zbardhjen e rrethanave të rastit. Si rezultat i veprimeve të shpejta hetimore dhe procedurale, është identifikuar, kapur dhe vënë në pranga autori i dyshuar, shtetasi Ronald Lacej, 51 vjeç”, njofton policia.
51-vjeçari dyshohet se gjatë një konflikti për motive të dobëta, me shtetasin Mikel Xibro, 48 vjeç, e ka goditur atë, me thikë. Xibro ndodhet në spital, në kujdesin e mjekëve, jashtë rrezikut për jetën.
Në cilësinë e provës materiale u sekuestrua thika e dyshuar e përdorur për plagosjen.
