Një qytetare nga Tirana është ankuar në emisionin investigativ “Fiks Fare” për një mashtrim lidhur me një premtim punësimi në Gjermani. Ajo me origjinë nga Tirana, pas një reklame të agjencisë “REMANY Office”, vendosi të paguajë 2 mijë euro për të siguruar një kontratë pune brenda një viti, ose një kthim të plotë të shumës në rast dështimi.
Ajo tregon se fillimisht kontaktoi agjencinë përmes rrjeteve sociale dhe arriti të paguante. Megjithatë, pas kalimit të një viti dhe pa ndonjë rezultat, komunikimi me zyrën u bë problematik. Menaxheret e agjencisë në Instagram i premtonin vazhdimisht kthimin e parave, por ajo nuk mori asnjë përgjigje konkrete. Ajo tha se kishte biseda që e ndihmonin vetëm të humbiste kohë, duke u premtuar takime që kurrë nuk u realizuan.
Gazetarët e Fiksit kontaktuan menjëherë zyrën e agjencisë, ku folën me një vajzë të quajtur Xhoana, e cila pranoi se ishin të vetëdijshëm për problematikën dhe premtoi kthimin e parave të qytetares. Megjithatë, ajo pretendonte se ata kishin planifikuar një telefonatë me të, por qytetarja nuk kishte përgjigjur.
Pas insistimit të gazetarit, Xhoana tha se agjencia nuk kishte synim të mbante paratë dhe do të procedonte menjëherë me kthimin e shumës. Si rezultat, pak minuta pas bisedës, qytetarja u njoftua të paraqitej për të marrë paratë e saj. Ajo u shpreh e lumtur për ndërhyrjen e emisionit “Fiks Fare”, duke e vlerësuar si një zgjidhje për një problem që e kishte munduar për një vit.
Ky rast shërben si një shembull i mashtrimeve që ndodhin në fushën e punësimit ndërkombëtar dhe thekson rëndësinë e kujdesit dhe pranisë së mediave për të mbrojtur qytetarët nga skemat e tilla.
