Pas disa vitesh mungesë në skenën shqiptare, Erand Sojli është rikthyer. Dikur ai ishte një ndër aktorët më të dashur me rolet e tij, por pas shkëputjes për në SHBA, jeta e tij ndryshoi. Me disa projekte në kinematografi dhe teatër, Erandi ia doli që të bëjë art dhe në kontinentin e largët, duke përmbushur kështu një ëndërr të tijën.
Aktori i ka thënë po ftesës për të qenë pjesë e “Ferma VIP”, që ka nisur javën e shkuar. Duhet thënë se prania e tij në këtë reality, ka kuriozuar fansat, që do të kenë mundësi të shikojnë Erandin në një format tërësisht të ndryshëm.
Por në televizion, Erandi kthehet ndryshe nga sa u largua vite më parë. Burime bëjnë me dije se aktori është ndarë nga bashkëshortja e tij, Rina Narazani.
Çifti, kishin një histori të gjatë dashurie si dhe një bashkëpunim të përkryer edhe në skenë. Kujtojmë se ai dhe Rina kanë qenë së bashku në skenën e “Portokalli”, vite më parë me rolin e “Thëllëzës” dhe “Naqes”. Pas një periudhe që jetuan të ndarë, ku Rina dhe fëmijët ishin larguar në SHBA, ndërsa Erandi vijoi edhe për pak në Shqipëri, dyshja ia doli që niste karrierën edhe në SHBA.
Por atëherë kur dukej se u plotësua edhe tabloja e familjes perfekte, diçka ka ndodhur dhe çifti i ka dhënë fund. Miqtë e afërt e kanë ditur një fakt të tillë prej kohësh, por kanë preferuar që mos të flasin rreth arsyeve që kanë çuar në këtë divorc. Vetë aktori nuk ka folur asnjëherë për ndarjen nga partnerja e tij, duke preferuar që të gjithë vëmendjen ta orientojë në punët e tij që bën në kinematografi.
E tashmë që është rikthyer tek “Ferma VIP”, Erandi do të flasë për historinë e divorcit të tij. Në fakt, që në natën e parë, Luana e ngacmoi disi aktorin.
“Ke ardhur me zemrën e zënë, apo vetëm” e pyeti moderatorja në lidhje live. I zënë ngushtë nga kjo pyetje, aktori tentoi që të largohej duke thënë se e kishte zemrën plot me gjithë ata konkurrentë që kishte pranë. Dukej se kjo ishte vetëm sinjali i parë rreth faktit që në mënyrë indirekte Sojli pranoi se tashmë ishte single.
Në intervistën e fundit që ai dha përpara se të largohej, foli për dashurinë e madhe që kishte për Rinën dhe familjen që kishin krijuar të dy. Përveç eksperiencave në vendin e tij, ai i është përkushtuar interesit të shqiptarëve të Amerikës për teatrin dhe aktrimin. I ftuar në një emision televiziv ai foli për historinë dhe eksperiencën e tij në Amerikë. Më tej tregoi se gruaja bashkë me fëmijët jetojnë andej, ndërkohë që ai është rikthyer në Shqipëri.
“Do i thosha që e dua shumë dhe do i dedikoja një këngë”, është shprehur Erand Sojli, i cili më vonë u ngrit për të kënduar këngën “Dance me to the end of love” të artistit legjendar Leonard Cohen, dedikuar gruas së tij.
Po pas pak vitesh nga kjo deklaratë kaq romantike, Rina dhe Erandi i kanë dhënë fund martesës së tyre, duke qenë tashmë vetëm prindër të dy vajzave. Me gjasa do të jetë vetë aktori ai që do të zbulojë më shumë detaje nga ky divorc./panoramaplus
