Shfaqja e filmit “Lejleku” e regjisorit shqiptar Isa Qosja, e planifikuar më 3 shtator në festivalin ndërkombëtar Xhada Film Fest në Podgoricë, u ndërpre për shkak të reagimeve të ashpra nga një grup individësh, të cilët shprehën pakënaqësi për faktin se filmi ishte në gjuhën shqipe. Organizatorët njoftuan se, për arsye sigurie, vendosën ta ndalojnë shfaqjen, pas një situate të pakëndshme dhe në prani të policisë.
Ky incident ka shkaktuar një dëmtim të lirisë së shprehjes artistike dhe ka qenë një akt i hapur urrejtjeje ndaj përkatësisë kombëtare dhe përdorimit të gjuhës shqipe, sipas organizatave joqeveritare në Mal të Zi. Ato e quajtën të papranueshme situatën, duke kërkuar një hetim të plotë dhe përgjegjësi nga institucionet.
Edhe Delegacioni i Bashkimit Evropian në Mal të Zi, që mbështet financiar festivalin, shprehu shqetësim për këtë incident. Ai theksoi se liria e shprehjes artistike është një nga vlerat thelbësore demokratike. Nënkryetari i Parlamentit të Malit të Zi, Nikoll Camaj, e quajti këtë rast të papranueshëm dhe shpërfillës për frymën qytetare të vendit, duke kërkuar një reagim të vendosur nga institucionet.
Camaj shprehu angazhimin e tij për të çuar para përgjegjësinë e autorëve të incidentit dhe theksoi rëndësinë e mbrojtjes së çdo kulture dhe gjuhe në Mal të Zi. Ai u gëzua se filmi “Lejleku” do të shfaqet në Televizionin e Malit të Zi si një përgjigje simbolike ndaj aktit të ndërprerjes.
Filmi “Lejleku”, që pati premierën në PriFest në Prishtinë në shtator 2024, trajton temën e emigracionit përmes historisë së tri brezave të grave nga fshati i braktisur Vuthaj, që ndodhet në kufirin malazezo-shqiptar. Projekti është mbështetur nga Eurimages dhe është realizuar në bashkëprodhim me disa vende të rajonit. Ky incident ka rritur shqetësimet për tolerancën kulturore dhe bashkëjetesën në një shtet shumetnik.
