Rrjeti televiziv ABC ka pezulluar për një kohë të pacaktuar emisionin e famshëm “Jimmy Kimmel Live” pas komenteve kontroversiale të prezantuesit mbi të shtënat me armë ndaj influencuesit konservator Charlie Kirk. Një zëdhënës i ABC, i cili është në pronësi të kompanisë Disney, konfirmoi pezulimin duke e cilësuar si një vendim të nevojshëm pas kritikave që ndoqën monologun e Kimmel-it, të cilat u përshkruan si “fyese dhe të pandjeshme”.
Gjatë emisionit, Kimmel kishte ironizuar reagimin e Presidentit Donald Trump dhe kishte sugjeruar se “banda MAGA” (Make America Great Again) po përpiqej të përfitonte politikisht nga incidenti tragjik. Reagimi i Kimmel-it nuk është pritur mirë nga disa grupe, përfshirë Nexstar Media dhe Sinclair, që janë ndër rrjetet më të mëdha të shpërndarjes televizive në SHBA. Ata e cilësuan deklaratën e tij si “të papërshtatshme në një kohë kritike politike”. Në mes këtyre kritikave, Trump e përshëndeti pezullimin e programit dhe e quajti këtë një “lajm të shkëlqyer për Amerikën”.
Edhe kreu i FCC-së, Brendan Carr, falënderoi transmetuesit për “bërjen e gjësë së duhur”, duke kontribuar në atmosferën e tensionuar që ka ndodhur në lidhje me lirinë e fjalës pas këtij incidenti. Përfaqësues të sindikatave të Hollivudit dhe Shoqërisë së Shkrimtarëve të Amerikës, megjithatë, e kritikuan pezullimin dhe e intepretonin si një sulm ndaj lirisë së shprehjes.
Kimmel, i cili u pa duke lënë studion në Los Angeles pa bërë komente për mediat, mbetet i pezulluar, dhe ABC tani pritet të vendosë mbi të ardhmen e tij në javët e ardhshme. Ky incident tregon tensionin aktual në kontekstin politik amerikan dhe si komentet mbi situata delikate mund të kenë pasoja në botën e mediave.
