Policia greke ka ngritur akuza ndaj pesë personave në lidhje me vrasjen e profesorit të njohur të Universitetit të Kalifornisë, Przemyslaw Jeziorski, i cili u qëllua për vdekje në një lagje të Athinës më 4 korrik.
43-vjeçari, profesor i ekonomisë dhe marketingut në Universitetin UC Berkeley, ndodhej në Greqi për të vizituar fëmijët dhe për të marrë pjesë në një seancë gjyqësore për kujdestarinë e tyre.
Sipas policisë, ai u qëllua me disa plumba në qafë dhe kraharor nga një person i maskuar. Ngjarja ndodhi në mes të ditës, rreth orës 16:15, pranë shtëpisë së ish-bashkëshortes së tij në lagjen Agia Paraskevi. Në vendngjarje u gjetën shtatë gëzhoja të kalibrit 9 mm.
I dashuri aktual i ish-bashkëshortes ka pranuar vrasjen dhe është akuzuar për vrasje me paramendim. Tre burra të tjerë, dy shtetas shqiptarë dhe një bullgar, janë akuzuar si bashkëpunëtorë, njëri prej të cilëve është i mitur.
Ish-bashkëshortja e viktimës është akuzuar si bashkautore, por përmes avokatit të saj mohon çdo përfshirje.
Të pesë të arrestuarit janë paraqitur para prokurorit mëngjesin e së enjtes dhe kanë afat deri të hënën për të përgatitur mbrojtjen e tyre.
Policia ka konfirmuar se Jeziorski nuk kishte ndonjë precedent penal në Greqi.
