Protestat e dhunshme që kanë përfshirë Nepalin kanë marrë një kthesë tragjike, pasi bashkëshortja e ish-Kryeministrit Jhala Nath Khanal humbi jetën, e përfshirë nga flakët që shkrumbuan banesën e saj.
Mediat lokale raportojnë se përveç rezidencave të disa figurave politike, edhe godina e Parlamentit është djegur, duke e zhytur vendin në një krizë të thellë politike e shoqërore.
Lëvizja protestuese, e udhëhequr kryesisht nga të rinjtë, nisi pas vendimit të autoriteteve për bllokimin e rrjeteve sociale, por zemërimi popullor lidhet më së shumti me korrupsionin e lartë dhe mungesën e perspektivës për brezin e ri.
Në kulmin e trazirave, kryeministri KP Sharma Oli dha dorëheqjen, duke deklaruar se ky hap synon t’i hapë rrugë një zgjidhjeje politike dhe stabilitetit në vend. Dorëheqja e tij erdhi në një moment kur protestat ishin përshkallëzuar dhe përplasjet me forcat e sigurisë kishin marrë jetë njerëzish.
Demonstratat kanë hyrë tashmë në ditën e dytë, duke kulmuar me djegien e Parlamentit si akt zemërimi pas vrasjes së 19 protestuesve nga policia në Katmandu. Përveç ndërtesave shtetërore, turma të revoltuara kanë sulmuar edhe shtëpitë dhe zyrat e politikanëve, si dhe selitë e partive, duke kthyer kryeqytetin dhe qytete të tjera në skena të dhunshme.
Në këtë situatë të nderë, presidenti Ramchandra Paudel u ka bërë thirrje qytetarëve për unitet kombëtar, ndërsa forcat e sigurisë janë dislokuar masivisht për të frenuar kaosin.
