Numri i të vdekurve nga përmbytjet katastrofike që goditën Teksasin ka arritur të paktën 78, ndërsa 41 persona të tjerë rezultojnë ende të zhdukur që nga e premtja.
Gjashtëdhjetë e tetë nga viktimat, mes tyre edhe 28 fëmijë humbën jetën në Qarkun Kerr, ku një kamp veror për vajza të krishtera buzë lumit u përmbyt. Ende dhjetra vajza rezultojnë të zhdukura.
Zyrtarët deklaruan se numri i viktimave pritet të rritet, pasi në 24-48 orët e ardhshme rajoni rrezikohet nga stuhi të tjera që mund të vështirësojnë më tej operacionet e shpëtimit.
Ekipet e kërkim-shpëtimit tashmë përballen edhe me rreziqe shtesë, si gjarpërinj helmues ndërsa kontrollojnë baltën dhe mbeturinat.
Tre ditë pas katastrofës, një nga operacionet më të mëdha të kërkim-shpëtimit në historinë e fundit të Teksasit po kthehet gradualisht në një mision rimëkëmbjeje.
Ndërkohë, në Qarkun Kerr, nga personat e shpëtuar 18 të rritur dhe 10 fëmijë ende nuk janë identifikuar zyrtarisht.
Guvernatori i Teksasit, Greg Abbott, deklaroi të dielën se autoritetet nuk do të ndalen para asgjëje për t’u siguruar që të gjendet çdo person i zhdukur.
“Ishte thjesht e tmerrshme të shihje se çfarë përjetuan ata fëmijë të vegjël”, tha Abbott, një ditë pasi vizitoi zonën.
