Mbi 1.000 viktima nga përmbytjet rekord në Azi: Sri Lanka dhe Indonezia nën ujë
Ekipet e shpëtimit dhe ushtria kanë punuar pa ndalur për të hapur rrugët dhe për t’i ardhur në ndihmë mijëra njerëzve të prekur nga përmbytjet shkatërruese në Sri Lanka dhe Indonezi. Fatkeqësia natyrore ka shkaktuar mbi 1.000 viktima dhe qindra persona të zhdukur në katër vende aziatike gjatë ditëve të fundit.
Një ciklon i fuqishëm goditi Sri Lankën, ndërsa një stuhi e jashtëzakonshme përfshiu Tajlandën, Malajzinë dhe Indonezinë – veçanërisht ishullin e madh të Sumatras – duke sjellë reshje të dendura shiu në një periudhë që përkon me kulmin e sezonit të monsonit.
Në Sumatra, numri i të vdekurve nga përmbytjet është rritur sërish, duke arritur në 502 viktima, ndërsa mbi 500 persona vazhdojnë të rezultojnë të zhdukur, sipas njoftimit të agjencisë shtetërore për menaxhimin e katastrofave.
Ky bilanc i përkohshëm e çon numrin total të viktimave nga përmbytjet e fundit në rajon në mbi 1.000, ndërsa autoritetet paralajmërojnë se shifrat mund të rriten për shkak të dëmeve të mëdha dhe terrenit të vështirë që pengon kërkim-shpëtimin.
