Inter hodhi një hap të madh drejt titullit kampion, pasi përmbysi Como në transfertë me rezultatin spektakolar 4-3, duke e çuar diferencën në nëntë pikë ndaj Napolit, kur kanë mbetur edhe gjashtë javë deri në fund të sezonit.
Skuadra e Cesc Fabregas e nisi ndeshjen në mënyrën më të mirë, duke befasuar zikaltërit me dy gola. Fillimisht shënoi Valle, që realizoi golin e tij të parë në Serie A, ndërsa më pas Nico Paz dyfishoi shifrat, duke i dhënë Como një avantazh të rëndësishëm. Megjithatë, Inter reagoi në momentin më të vështirë dhe arriti të rikthehej fuqishëm në lojë.
Marcus Thuram ngushtoi diferencën në fundin e pjesës së parë, duke i dhënë shpresë skuadrës së tij para pushimit. Në pjesën e dytë, Inter ndryshoi ritëm dhe përmbysi gjithçka. Thuram realizoi edhe golin e dytë personal, ndërsa Dumfries shënoi dy herë për të vulosur kthesën e madhe të zikaltërve.
Como provoi të rihapte sfidën në minutat e fundit me penalltinë e kthyer në gol nga Da Cunha, por nuk arriti të shmangte humbjen, pavarësisht se në disa momente iu afrua sërish golit, madje goditi edhe shtyllën dhe traversën.
Ndeshja tregoi dy fytyra të ndryshme: nga njëra anë një Como e guximshme, që krijoi shumë dhe vuri në vështirësi Inter, por që pagoi shtrenjtë gabimet individuale dhe mungesën e përvojës; nga ana tjetër, një Inter që edhe pse vuajti, tregoi karakter, efikasitet dhe qetësi në momentet vendimtare.
Një nga figurat kryesore të ndeshjes ishte edhe Barella, i cili dhuroi dy asiste dhe udhëhoqi mesfushën me një paraqitje të nivelit të lartë. Kjo fitore mund të rezultojë vendimtare për skuadrën e Chivu, e cila tashmë sheh shumë pranë titullin e 21-të në historinë e klubit.
Për Inter, kjo ishte më shumë se një fitore. Ishte një deklaratë force në momentin më të rëndësishëm të sezonit.
