Këtë të premte, 6 qershor, pritet që të përfundojë edhe afati i aplikimeve për postin e kreut të Byrosë Kombëtare të Hetimit.
Burime për Euronews Albania bëjnë me dije se deri në këto momente janë paraqitur katër kandidatura të cilët synojnë detyrën e drejtorit të BKH-së. Mes tyre mësohet se qëndron edhe emri i Gledis Nanos, ish-drejtorit të Përgjithshëm të Policisë së Shtetit.
Pas kalimit në disa faza testimi dhe vlerësimi, komisioni i ngritur pranë Strukturës së Posaçme kundër Korrupsionit dhe Krimit të Organizuar (SPAK) pritet që së shpejti t’i dërgojë Këshillit të Lartë të Prokurorisë emrin e kandidatit të përzgjedhur për postin e kreut të ri të Byrosë Kombëtare të Hetimit (BKH).
Kjo fazë vjen në kuadër të përfundimit të mandatit pesëvjeçar të drejtueses aktuale të BKH-së, Aida Hajnaj, e cila do të vijojë të qëndrojë në detyrë deri më 31 gusht.
Komisioni i përzgjedhjes në SPAK përbëhet nga kreu i institucionit, Altin Dumani, si dhe prokurorët Arben Kraja dhe Behar Dibra. Pas përfundimit të procedurave të vlerësimit, emri i përzgjedhur do t’i propozohet zyrtarisht Këshillit të Lartë të Prokurorisë për emërim.
Kush është Gledis Nano:
Gledis Nano, ka mbajtur më herët postin e Drejtorit të Përgjithshëm të Policisë së Shtetit. Ai u shkarkua me vendim të qeverisë nga kjo detyrë në një ditë të nxehtë gushti të vitit 2022, me argumentin se nuk i ka realizuar objektivat.
Gledis Nano është trajnuar gjatë të gjithë karrierës së tij nga agjencitë më prestigjoze ligjzbatuese perëndimore dhe në 2017 është diplomuar në Akademinë Kombëtare të FBI.
Ai u emërua në detyrën e kreut të Drejtorisë të Anti-Terrorit që prej 17 shkurtit 2016, pas një pune të gjatë dhe eksperience 17 vjeçare si pjesë e Policisë së Shtetit. Më pas ai mori postin e drejtorit të Përgjithshëm të Policisë së Shtetit, detyrë të cilën e mbajti për një periudhë të shkurtër.
Gjatë të gjithë karrierës Nano ka kryer detyra të ndryshme në polici ku ka pasur rezultate në zbulimin e ngjarjeve të rëndësishme.
Në vitin 2013 ka kryer hetimet e dosjes se “Imamëve” të arrestuar për terrorizëm, ngjarje e cila ka pasur shumë jehonë si një nga më të suksesshmet në këtë fushë në të gjithë rajonin. Gledis Nano po ashtu drejtoi të gjithë operacionin sekret të dëbimit muaj më parë nga Shqipëria të diplomatëve iranianë.
Në 17 gusht të vitit 2021, Nano u vlerësua nga Ambasadorja e SHBA Yuri Kim me një çmim të rëndësishëm. Ai vlerësohej për bashkëpunimin dhe përkushtimin e tij në mbështetje të përpjekjeve të përbashkëta të Ambasadës Amerikane me Policinë e Shtetit Shqiptar për të luftuar terrorizmin global.
Në certifikatë shkruhej “Për partneritetin e jashtëzakonshëm dhe dedikimin në mbështetje të Ambasadës Amerikane në Tiranë Shqipëri, dhe përpjekjet e përbashkëta në luftën botërore ndaj terrorizmit. Vendosmëria juaj dhe përkushtimi në luftën kundër terrorizmit ka sjellë kredite të mëdha e të shtuara tek vetja juaj edhe për Drejtorinë e Antiterrorit dhe Policinë e Shtetit”.
