Prokuroria pranë Gjykatës së Shkallës së Parë të Juridiksionit të Përgjithshëm Shkodër ka përfunduar hetimet dhe ka dërguar në gjyq shtetasin A.Th., i akuzuar për veprën penale “Mashtrimi, i kryer më shumë se një herë”, të parashikuar nga neni 143, paragrafi i dytë i Kodit Penal.
Sipas organit të akuzës, nga hetimet e zhvilluara, rezulton se shtetasi A.Th., në cilësinë e administratorit të një shoqërie tregtare që operonte në fushën e trajnimeve dhe ndërmjetësimit për studime jashtë vendit, dyshohet se ka mashtruar në mënyrë të përsëritur disa shtetas të huaj.
Prokuroria bën me dije se personat e dëmtuar kanë kryer pagesa për procedura aplikimi dhe programe studimi jashtë shtetit, bazuar në premtimet për shërbime që më pas nuk janë realizuar sipas marrëveshjeve të lidhura.
Sipas hetimeve, në disa raste shërbimet e premtuara nuk janë ofruar fare, ndërsa në raste të tjera janë ofruar vetëm pjesërisht, duke u shkaktuar dëme pasurore shtetasve të huaj që kishin kryer pagesat.
Prokuroria e Shkodrës thekson se mbetet e angazhuar në mbrojtjen e interesave pasurore të qytetarëve dhe në ndjekjen penale të çdo rasti mashtrimi.
