Franco Mastantuono është i destinuar të jetë një nga emrat e mëdhenj në futbollin e Amerikës së Jugut. Performancat e tij me River Plate kanë marrë vëmendjen e shumë klubeve të mëdha në Europë.
Vetëm 17 vjeç, talenti i ri argjentinas ka arritur të tërheqë vëmendjen e shumë klubeve, falë guximit, teknikës së rafinuar dhe pjekurisë së tij në fushë.
Ndër klubet që kanë vënë syrin te djaloshi që luan si mesfushor me tipare sulmuese, është Manchester City, ku Pep Guardiola sheh te Mastantuono një yll të ardhshëm që do të përshtatej në mënyrë të përkryer në stilin e tij të lojës.
Drejtuesit e “Qytetarëve” po shqyrtojnë seriozisht bërjen e një oferte të rëndësishme për të siguruar nënshkrimin me 17-vjeçarin , duke dashur t’i paraprijnë klubeve të tjera të mëdha që po e ndjekin nga afër talentin argjentinas.
Mastantuono shënoi mbrëmë një supergol nga distanca përmes goditjes së dënimit në superklasiken e Argjentinës, ku River Plate fitoi 2-1 ndaj Boca Juniors dhe 17-vjeçari ishte një nga më të mirët në fushë dhe protagonist me kryeveprën e tij.
