Pekini ka reaguar ashpër ndaj paralajmërimeve të Donald Trump për rritjen e tarifave ndaj Kinës deri në 125 për qind, duke deklaruar se një veprim i tillë bie ndesh me interesat globale.
Zëdhënësi i Ministrisë së Jashtme kineze, Lin Jian, tha se tarifat “dëmtojnë rëndë sistemin shumëpalësh të tregtisë së bazuar në rregulla dhe ndikojnë seriozisht në stabilitetin e rendit ekonomik global”. Ai i cilësoi këto masa si “kërcënime” për të detyruar vendet e tjera të bëjnë lëshime.
“Ky është një veprim i hapur që bie ndesh me vullnetin e botës dhe me vetë botën,” u shpreh Lin Jian.
Deklarata e fortë vjen ndërsa Ministria e Tregtisë së Kinës përsëriti vendosmërinë për të “luftuar deri në fund”, nëse Trump vazhdon të këmbëngulë në vendosjen e tarifave të ashpra ndaj importeve të huaja.
Zëdhënësja e kësaj ministrie, He Yongqian, theksoi se “presioni, kërcënimet dhe shantazhi nuk janë mënyra për të trajtuar Kinën”. Ajo dënoi vendosjen e “tarifave të paarsyeshme” ndaj partnerëve tregtarë, përfshirë Kinën, duke shtuar se këto masa “cenojnë rëndë të drejtat dhe interesat legjitime të kompanive kineze dhe ndikojnë negativisht në rendin ekonomik global”.
“Dera për dialog është e hapur, por duhet të bazohet në respekt të ndërsjellë dhe barazi,” përfundoi ajo.
