“S’e përjashtoj garën!”. Kjo ishte përgjigja e deputeti demokrat Klevis Balliu kur u pyet nëse do të jetë ai kandidati i Partisë Demokratike që do të sfidojë Ogerta Manastirliun në garën për kryetar të Bashkisë së Tiranës.
“S’e përjashtoj unë. S’e përjashtoj garën. Asnjëherë nuk e përjashtoj unë garën. Do duhet ta mendoj, do duhet të shikoj veten, do duhet ta mendoj garën, por nuk e përjashtoj. Dhe mua që më pyesni ju, nuk e di nëse e dua apo jo. Por unë nuk mund ta përjashtoj. Nuk mund të të them as po as jo. Sepse e para nuk ka asnjë diskutim. E dyta nuk e dimë me çfarë formati do shkojmë, e treta nuk e dimë a do të ketë kohë për të bërë Primare. T’ju them unë ju që nuk do futem, nuk e them dot”, tha Balliu.
I vendosur përballë kritikave të gazetarëve për mungesën e një kandidati nga PD për këtë garë, duke qenë se prej muajsh pritej shkarkimi i Erion Veliajt dhe shkuarja në zgjedhje të pjesshme, Balliu tha se asnjë nga kolegët e tij nuk e përjashton mundësin për të garuar.
“Kandidatë do ketë. PD do të jetë në zgjedhjet e bashkisë së Tiranës kurdo që ato të jenë me një kandidat të vetin. Jam i bindur që asnjë nga kolegët nuk e përjashton si garë. Dhe kolegë të tjerë nuk e përjashtojnë si proces dhe për këtë ju garantoj unë. Jo çdo njeri do të bëjë garë për pushtetin lokal, ka një fizionomi, ose një profil politik ndryshe. Mos prisni çdo njeri të dojë të bëhet kryetar bashkie. Ka njerëz që nuk duan”, u shpreh Balliu.
Ndërkohë gazetari Ardit Hoxha tha se është e turpshme për forcën kryesore të opozitës që figurat më të spikatura të saj kanë frikë të hynë në garën për bashkinë më të madhe të vendit, pasi mendojnë se do e humbin atë.
“Ne kemi parë, që mund ta cilësoj deri diku joserioze për forcën kryesore opozitare, kur figura të spikatura të PD, kur pyeten nëse do të kandidojnë për Bashkinë e Tiranës, ose tërhiqen ose gjejnë skuza nga më të ndryshmet. PD duhet të vendosë… Është frikë. Mesazhi që jepet të demokratët është frikë se askush nuk do të futet në një garë që mund ta humbasë”, tha gazetari Ardit Hoxha.
