Albin Kurti ka bërë deklarimin e radhës të pasurisë dhe duket se gjendja e tij ekonomike nuk ka pësuar ndryshime. Agjencia për Parandalimin e Korrupsionit ka publikuar deklarimin vjetor të pasurisë së tij dhe shihet se kryeministrit të Kosovës i është shtrenjtuar qiraja e banesës me 100 euro më shumë, teksa i janë ulur kursimet.
Sa i përket pasurive të paluajtshme dhe atyre të luajtshme nuk ka ndonjë ndryshim. Si pasuri të paluajtshme, Kurti ka deklaruar banesën e bashkëshortes, e vlerësuar 530 mijë euro.
Para të gatshme në emër të tij ka deklaruar 16.41 euro, në emër të bashkëshortes 19500 euro, me burim nga paga dhe trashëgimi nga prindi, 2000 euro kursime të vajzës dhe 50 euro tjera të vajzës, që thotë se burojnë si dhuratë nga familjarët.
Vjet ai i kishte deklaruar 1800 euro kursime. Si borxh ka deklaruar kredinë e bashkëshortes në vlerë të mbetur 160 mijë euro dhe ka renditur qiranë e banesës, që tani e paguan 350 euro, nga 250 sa e paguante vjet. Te të hyrat vjetore, Kurti ka renditur 21 mijë e 315 euro nga paga si kryeministër dhe 51 mijë euro të bashkëshortes.
