Sterilizimi i pajisjeve mjekësore duket se do të kthehet përsëri në kompetencë shtetërore, 10 vjet pas nënshkrimit të koncesionit famëkeq të sterilizimit, i cili i ka kushtuar buxhetit të shtetit më shumë se 114 milion euro.
Ky koncesion është shoqëruar me një proces gjyqësor ndaj ish-ministrit të Shëndetësisë Ilir Beqaj dhe disa zyrtarëve të tjerë, të cilët akuzohen për “Korrupsion”, “Shpërdorim detyre” dhe “Grup të strukturar kriminal”.
Sipas raportimeve të fundit, më 30 dhjetor 2025, Këshilli i Ministrave vendosi krijimin e një shoqërie shtetërore nën varësinë e Ministrisë së Shëndetësisë për të marrë ofrimin e shërbimeve të sterilizimit nga kompania koncesionare “SaniService”, e cila prej janarit 2024 ndodhet nën sekuestro. Shoqëria e re, “Operatori i Shërbimeve të Integruara të Sterilizimit” (OSHIS sh.a.), me kapital 100% shtetëror, do të ofrojë të njëjtat shërbime ndaj spitaleve publike, kundrejt pagesës.
“OSHIS” do të ketë kapital fillestar 200 milionë lekë nga fondet e Ministrisë së Shëndetësisë dhe më pas parashikohet të vetëfinancohet nga të ardhurat e shërbimit.
Kontrata e sterilizimit është një nga marrëveshjet më të kushtueshme të sektorit të shëndetësisë, për të cilën hetimet e SPAK kanë çuar në përfundime për shkelje ligjore gjatë dhënies së koncesionit, me favorizim të kompanisë së Ilir Rrapajt. Në listën e shkeljeve përfshihen studim fizibiliteti me të dhëna të pavërteta, kritere të hartuara për të përshtatur fituesin dhe konflikt interesi i pazgjidhur, si dhe negociim kontrate në dëm të shtetit.
Për këtë çështje janë marrë të pandehur ish-ministri Ilir Beqaj, ish-zv.ministri Klodian Rrjepaj, biznesmeni Ilir Rrapaj dhe anëtarë të komisionit të dhënies së koncesionit. Beqaj po gjykohet veçmas, pasi nuk pranoi gjykim të shkurtuar dhe ndodhet ende në paraburgim.
