Pas ndeshjes mes Dinamo City dhe Jagiellonia, e zhvilluar mbrëmjen e djeshme në “Arena Kombëtare”, situata në kryeqytet ka përfunduar në akte dhune dhe tensione të forta mes tifozerive.
Ngjarja nisi me një incident afër stadiumit, ku një huligan polak u dhunua nga një grup tifozësh shqiptarë. Ky person ishte identifikuar si një prej atyre që më herët ishte filmuar duke kryer një akt të turpshëm, duke përdhosur bustin e Heroit Kombëtar, Gjergj Kastrioti Skënderbeu, në sheshin qendror të Tiranës.
Kjo ngjarje kishte shkaktuar zemërim të madh në rrjetet sociale, duke pasuar me reagime të ashpra nga qytetarët.
Situata u përshkallëzua edhe më tej, kur një tjetër video tregoi një sulm ndaj autobusit të tifozëve të Jagiellonias, afër Rinasit, ku grupet e tifozëve u përplasën mes tyre. Pamjet tregojnë thirrje të shumta dhe tension të madh, ndërkohë që autoritetet ishin të detyruara të ndërhynin me forcë për të qetësuar situatën.
Tifozët polakë kryen sjellje provokuese dhe raciste në rrugët e Tiranës, përfshirë gjeste të pahijshme poshtë bustit të Skënderbeut dhe valëvitje të flamurit me mbishkrimin “Kosova është Serbi”. Grupi i tifozëve të Jagiellonias është i njohur për aktivitetet e tij radikale dhe për shpërndarjen e koreve dhe këngëve me përmbajtje anti-shqiptare.
Ndeshja përfundoi me një barazim 1-1, por skuadra shqiptare u eliminua nga Liga e Konferencave për shkak të humbjes 3-0 në ndeshjen e parë në Poloni.
