Prokuroria e Lartë Publike në Beograd ka ngritur aktakuzë ndaj tre individëve për neglizhencë që çoi në shembjen e strehës në Stacionin Hekurudhor të Novi Sadit. Ky incident, i ndodhur më 1 nëntor të vitit të kaluar, shkaktoi humbjen e jetës së 15 personave.
Aktakuza është ngritur kundër menaxheres së zhvillimit të investimeve në kompaninë “Infrastruktura Hekurudhore e Serbisë”, kryetarit të Komisionit për Inspektimin Teknik të Stacionit Hekurudhor në Novi Sad, dhe anëtares së këtij komisioni.
Kryeprokurori i Prokurorisë së Lartë Publike, Nenad Stefanoviç, ka deklaruar se aktakuza është ngritur për veprat penale me elemente korruptive që çuan në shembjen e strehës.
Pas tragjedisë në Novi Sad, studentët në Serbi organizuan protesta dhe bllokada masive në disa qytete, duke kërkuar përgjegjësi penale dhe politike për ngjarjen. Kryeministri i Serbisë, Millosh Vuçeviç, dhe kryetari i Novi Sadit, Millan Gjuriç, dhanë dorëheqjen.
Presidenti Aleksandar Vuçiç ka theksuar se kërkesat e studentëve janë plotësuar, por protestat vazhdojnë, duke tërhequr edhe qindra mijëra qytetarë.
