Partizani arriti një fitore të rëndësishme në ndeshjen e javës së 25 të Kategorisë Superiore, duke mundur Flamurtarin me rezultatin 2-1, një rezultat që ndihmon në ndezjen e garës për vendin e katërt në renditje, i cili siguron një vend në fazën e Final Four.
Flamurtari e nisi ndeshjen duke shënuar të parin, me golin e Maksutit në minutën e 8, i cili goditi nga distanca për të kaluar skuadrën në avantazh. Megjithatë, Partizani reagoi fort dhe riktheu balancën në fundin e pjesës së parë. Sidibe, i cili fitoi një penallti pas verifikimit nga VAR-i, ekzekutoi saktësisht 11 metërshin, duke e dërguar rezultatin 1-1 në pauzë.
Në fillim të pjesës së dytë, Partizani përmbysi rezultatin në minutën e 48 me një tjetër gol nga Sidibe, që përfitoi nga një gabim i Veigës. Situata u komplikuar për Flamurtarin kur, në minutën e 68, Ememe mori kartonin e dytë të verdhë dhe u ndëshkua me të kuqe, duke lënë skuadrën e tij me 10 lojtarë.
Flamurtari pati mundësi të barazonte rezultatin në minutën e 74, kur u akordua një penallti pas një kontrolli nga VAR-i. Herald Marku mori përsipër ekzekutimin, por Pano Qirko e priti gjuajtjen dhe e mbajti rezultatin në favor të Partizanit.
Pas kësaj ndeshjeje, Partizani ngjitet në vendin e pestë me 36 pikë, në një pozicion të barabartë me Dinamon, që ndodhet katër, ndërsa Flamurtari, me vetëm 20 pikë, zë vendin e fundit në tabelë. Ky rezultat forcon shpresat e Partizanit për të përmirësuar pozitat e tyre, ndërsa Flmurtari vazhdon të përballet me vështirësi në sezonin aktual.
