Në Itali, anëtarët e parlamentit nga partia opozitare Lëvizja Pesë Yjet (M5S) morën pjesë në një seancë parlamentare të veshur me ngjyrat e flamurit palestinez.
Të veshur me të kuqe, të zezë, të gjelbër dhe të bardhë, deputetët e M5S u ulën të shpërndarë në mënyrë të tillë që me trupat e tyre formuan flamurin e Palestinës gjatë seancës në Dhomën e Deputetëve – dhoma e ulët e parlamentit italian – duke dërguar një mesazh se flamuri palestinez është kthyer në simbol universal të të gjithë atyre që luftojnë për humanizëm.
Duke folur gjatë seancës, deputeti i M5S Riccardo Ricciardi deklaroi se flamurin e Palestinës nuk e kishin marrë me vete në duar sepse e dinin që do t’ua konfiskonin.
Ai më pas pyeti “ndërsa pothuajse i gjithë bota e njeh shtetin e Palestinës, pse Italia ende nuk e bën?”
“Sepse kjo tashmë nuk është më vetëm flamuri i Palestinës – kjo është flamuri i atyre që luftojnë për njerëzimin. Dhe ju jeni fajtorë. Keni heshtur edhe pse e dinit. Keni kthyer kokën anash ndërkohë që një popull po masakrohej. I keni shtrënguar duart e përgjakura të (kryeministrit izraelit Benjamin) Netanyahut”, shtoi ai.
Lideri i Lëvizjes Pesë Yjet, Giuseppe Conte, në një postim në rrjetet sociale, së bashku me një foto të deputetëve të partisë, deklaroi se Italia duhet të qëndrojë në anën e drejtë.
Ky veprim i deputetëve të M5S në Dhomën e Deputetëve tërhoqi vëmendjen e publikut italian.
Shumë qytetarë dhe mbështetës të çështjes palestineze në Itali, por edhe në pjesën tjetër të botës, ndanë në rrjetet sociale fotografitë e deputetëve të veshur me ngjyrat e flamurit palestinez
