Video e Blendi Fevziut, ku shfaqej një grua që i përngjante shumë këngëtares shqiptare Parashqevi Simaku bëri xhiron e rrjetit sot.
Pasi video u komentua nga shqiptarët, Fevziu tha se ai ka komunikuar me disa biznesmenë nga New York, të cilët janë ofruar të gatshëm për ta gjetur atë dhe për t’i ofruar ndihmë.
“Në 48 orët e fundit në llogarinë time në Instagram kam marrë nga ndjekësit e mi të njëjtën video. Bëhet fjalë për videon e kanalait “ABC7” të New York, kanali më i ndjekur i qytetit, në të cilën shfaqet një zonjë me emrin Simaku dhe me një emër amerikanë, e cila përfiton nga ndihmat si e pastrehë ose “homeless” siç quhet në Shtetet e Bashkuara të Amerikës për Krishtlindje.
E hodha këtë video sepse pretendimi i një pjese të madhe të atyre që ma nisen, ishte se është artisja e madhe Parashqevi Simaku. Sot pothuajse mbas 12 orësh që ajo qëndron në profilin tim në Instagram, kam marrë me qindra mesazhe që më japin akoma më shumë informacion për këtë. Po është Parashqevi Simaku, këngëtarja shqiptare, e cila u largua në vitin 1991 drejt SHBA-ve. Unë e kam takuar për herë të fundit Parashqevi Simakun në vitin 1995, në atë kohë kur ajo kishte filluar të jetonte në Los Angeles dhe synonte Hollywood-in.
Ndërsa sot, të gjitha informacionet më thonë se ajo është e pastrehë, është pa asnjë ndihmë financiare dhe jeton me ndihmat që merr si e pastrehë. Sot, biznesmenë të rëndësishëm amerikanë, njerëz të njohur të New York më kanë kontaktuar dhe më kanë thënë se kanë vendosur në dispozicion avokatët e tyre, apo njerëz të cilët merren me gjetjen e personave. Në momentin, kur disa persona i kanë folur shqip, ajo reagon dhe largohet, nuk do që ta gjejnë. Ata janë duke kërkuar, ku është, me se merret dhe padyshim është në dinjitetin e shtetit shqiptar që t’i ofrojë një pension normal, si një artiste e cila ka lënë gjurmë në artin shqiptar,”- tha Fevziu.
