Papa Leoni XIV ka nisur një vizitë 12-ditore në Amerikën Latine, vetëm tre javë pas një ndërhyrjeje kirurgjikale për heqjen e një tumori kanceroz në mushkërinë e djathtë. Gjatë udhëtimit drejt Uruguait, ndalesa e parë e turit që përfshin edhe Argjentinën dhe Perunë, Ati i Shenjtë tha se ndihej mirë dhe se nuk kishte pasur kurrë dyshime se do të mund ta realizonte këtë vizitë. I pyetur për gjendjen e tij, 71-vjeçari u përgjigj me humor se ndihej ndoshta edhe më mirë nga sa dukej.
Pas një fluturimi prej 13 orësh e gjysmë, Papa mbërriti në Montevideo, ku u prit nga mijëra besimtarë. Sipas Vatikanit, rreth 30 mijë persona dolën për ta përshëndetur. Ai u takua me presidentin e Uruguait, Yamandú Orsi, dhe mori pjesë në aktivitete fetare në kryeqytet.
Leoni XIV ia atribuoi rikuperimin besimit te Zoti, kujdesit të mjekëve dhe një stili të shëndetshëm jetese. Operacioni u krye më 13 tetor, pasi gjatë kontrolleve mjekësore ishte zbuluar një tumor në mushkëri. Vatikani ka konfirmuar se ndërhyrja ishte e suksesshme dhe se ekzaminimet e mëvonshme nuk kanë treguar nevojë për trajtim të mëtejshëm onkologjik.
