Ka nisur sot zbatimi i marrëveshjes së arritur mes Izraelit dhe Hamasit për një armëpushim, pas rreth 15 muajsh luftime.
Papa Francesku ka bërë thirrje për respektimin e menjëhershëm të armëpushimit në Gaza dhe ka kërkuar një rritje të ndihmave humanitare për ata që kanë nevojë.
“Unë shpreh mirënjohje për të gjithë ndërmjetësit. Faleminderit të gjitha palëve të përfshira në këtë rezultat të rëndësishëm. Shpresoj që, siç është rënë dakord, do të respektohet menjëherë nga palët dhe që të gjithë pengjet më në fund do të mund të kthehen në shtëpi dhe të përqafojnë të dashurit e tyre”, tha Papa Francesku pas fillimit të armëpushimit mes Izraelit dhe Hamasit.
Ai shtoi se shpreson që ndihma humanitare të mbërrijë më shpejt në Gaza, ku civilët kanë nevojë urgjente për mbështetje.
“Shpresoj që ndihma humanitare të arrijë edhe më shpejt. Njerëzit e Gazës kanë kaq shumë nevoja urgjente. Si izraelitët ashtu edhe palestinezët kanë nevojë për shenja të qarta shprese. Shpresoj që autoritetet politike të të dyja palëve, me ndihmën e komunitetit ndërkombëtar, mund të arrijnë një zgjidhje të drejtë për dy shtete. Të gjithë le t’i thonë po dialogut, po pajtimit, po paqes”, shtoi ai.
Në kuadër të armëpushimit fillestar 42-ditor, 33 robër të marrë gjatë sulmit të Hamasit në Izrael më 7 tetor 2023 do të kthehen nga Gaza.
