Është shtyrë sërish gjyqi në Gjykatën e Posaçme për padinë e shpifjes të bërë nga ish drejtori i Policisë së Shkodrës, Edmond Sula ndaj kreut të grupit parlamentar të PD-së, Gazment Bardhi, e cila ishte planifikuar të mbahej ditën e sotme.
Mësohet se gjyqtarja e çështjes e ka shtyrë seancën për në datën 13 Janar për shkak se gjykatës nuk i kishte ardhur konfirmim se Gazment Bardhi kishte marrë dijeni për gjyqin e kësaj të hëne.
I pranishëm në seancën e sotme ishte dhe Edmond Sula se bashku me avokatin, ndërsa Gazment Bardhi përfaqësohej nga avokati i tij, Marash Logu.
Seanca do të mbahet mbi një padi të dorëzuar në SPAK nga Edmond Sulaj mbi Bardhin për shpifje, bazuar mbi një deklaratë të deputetit demokrat në seancën plenare të 12 shtatorit nga foltorja e Kuvendit mbi bisedat e aplikacionit të enkriptuar “Sky Ecc”.
Palët ishin ftuar në GJKKO për ta zgjidhur çështjen me mirëkuptim, por seanca e parë dështoi, për shkak se mungonte avokati i Gazment Bardhit. Gjithashtu, edhe vetë Bardhi nuk ka qenë prezent në atë seancë, për shkak të një vizite zyrtare në Londër.
Pasi palët nuk pranuan ta zgjidhnin konfliktin me pajtim, Gjykata e Posaçme vendosi të kalonte çështjen në seancë gjyqësore.
Kujtojmë se kreu i grupit parlamentar të PD-së gjatë replikave me kryeministrin Edi Rama lexoi një komunikim në SKY ECC, për të cilat deklaroi se janë provë se ish-Drejtori i Policisë së Shkodrës, Edmond Sulaj është emëruar nga bandat.
Bardhi lexoi bisedat e bandave kriminale, ku flisnin për vendosjen e “Mondit” për një dimër në krye të Policisë së Shkodrës, që sipas demokratit bëhet fjalë për drejtorin aktual në atë kohë Edmond Sulaj.
Gazment Bardhi: “Unë po të pyes (i drejtohet Ramës) si ta quajnë drejtorin e policisë së Shkodrës, e di emrin? Ta them unë kush ta ka emëruar. Kodi pin i Sky ECC, DGLXJM: O vëlla ka llafe për atë mikun tënd ministër të Brendshëm. Di gjë ti? Përgjigjet kodi sky 7142D9: Po por kam frikë se nuk e bën.
Ndërhyn prapë kodi DGLXJM: Mua Mondi (Edmond Sulaj, kryepolici aktual i Shkodrës) më duhet një dimër aty vëlla. Në fakt Mondi është drejtori aktual i policisë Shkodër që u emërua një muaj pasi ky miku i ministrit të Brendshëm është përfaqësues i një prej bandave më të rrezikshme në vend u bë ministër i Brendshëm. Dhe vjen ti këtu dhe akuzon opozitën, se të thotë që je i lidhur me krimin e organizuar? Patjetër që do japësh llogari”
Pavarësisht se Bardhi deklaroi se Edmond Sulaj u vendos në krye të Policisë së Shkodrës vetëm një muaj pas komunikimeve në “Sky Ecc” për “Mondin”, vetë ish-kryepolici i Shkodrës reagoi dhe tha se ishte vendosur në atë pozicion tre vjet pas atyre komunikimeve.
