Fondi Kombëtar për Ruajtjen e Trashëgimisë Historike ka ngritur një padi ndaj Presidentit të SHBA-së, Donald Trump, duke kërkuar nga një gjykatë federale bllokimin e ndërtimit të sallës së re të vallëzimit në Krahun Lindor të Shtëpisë së Bardhë. Padia, e vendosur në Gjykatën Federale të Qarkut për Distriktin e Kolumbias, argumenton se prishja e pjesëve të Krahut Lindor dhe ndërtimi i sallës janë kryer pa miratimet e nevojshme dhe pa ndjekjen e procedurave ligjore.
Organizata jofitimprurëse, e cila është krijuar me qëllim mbrojtjen e trashëgimisë historike në SHBA, pretendon se, sipas ligjeve, asnjë president nuk ka të drejtë të nxjerrë vendime të tilla pa një proces transparent dhe pa konsultimin e publikut. “Asnjë president nuk mund të shembë pjesë të Shtëpisë së Bardhë pa ndjekur procedurat e duhna,” theksohet në padinë e saj.
Sipas padisë, projekti i ndërtimit shkel Aktin e Procedurës Administrative dhe Aktin e Politikës Kombëtare Mjedisore, duke përfshirë mungesën e konsultimeve me Komisionin Kombëtar të Planifikimit të Kapitalit. Në të kaluarën, një çift nga Virxhinia kishte ngritur një padi të ngjashme, por ajo u rrëzua shpejt. Kjo padi e re, nga një organizatë e njohur për ruajtjen e trashëgimisë, konsiderohet si përpjekja më serioze për ta penguar ndërtimin.
Nga ana tjetër, Shtëpia e Bardhë nuk ka shprehur nëse do të ndalojë përkohësisht ndërtimin për shkak të kësaj padie, por ka mbrojtur legjitimitetin e projektit duke thënë se Presidenti Trump ka autoritetin e plotë për të modernizuar Shtëpinë e Bardhë. Zëdhënësi i Shtëpisë së Bardhë, Davis Ingle, theksoi se çdo president ka pasur të drejtën të rinovojë këtë ndërtesë historike.
Salla e vallëzimit, me një sipërfaqe prej gati 90,000 metra katrorë, ka qenë nën kritika të ashpra nga grupet e trashëgimisë dhe banorët e Uashingtonit. Plani për projektin do të paraqitet gjithashtu para një komisioni federal të planifikimit këtë muaj, dhe rezultati i padisë mund të luajë një rol kyç në vazhdimin ose ndalimin e punimeve.
