Kombëtarja e Italisë po përgatitet për një ndryshim të fortë në grumbullim. Trajneri i përkohshëm, Silvio Baldini, ka vendosur të sjellë një qasje shumë më të ashpër përpara ndeshjeve miqësore të qershorit, me synimin për të rikthyer disiplinën dhe përqendrimin maksimal te skuadra.
Sipas asaj që raportohet, Baldini dëshiron t’i japë fund çdo ndjenje rehatie brenda ekipit, duke kërkuar përkushtim të plotë nga lojtarët dhe vëmendje të vazhdueshme ndaj objektivave. Për këtë arsye, stafi teknik ka përgatitur një paketë të re masash disiplinore që ndryshon ndjeshëm nga qasja më liberale e përdorur më parë.
Mes rregullave të reja, lojtarët nuk do të lejohen të qëndrojnë më vetëm në dhomë, por do ta ndajnë atë me një shok skuadre, me synimin për të rritur komunikimin dhe frymën e grupit. Gjithashtu, përdorimi i telefonave celularë brenda grumbullimit do të ndalohet plotësisht.
Po ashtu, stafi do të vendosë kontroll të përditshëm të gjendjes fizike, me peshime të detyrueshme, ndërsa përpikmëria në mëngjes është kthyer në një rregull të panegociueshëm. Me këto masa, Italia synon të ndërtojë një ambient më të disiplinuar dhe më të përqendruar.
