Banorët e fshatit Zboq në Bashkinë Maliq protestuan sot për shkak të kushteve të vështira infrastrukturore. Një nga problemet kryesore është mungesa e ujit të pijshëm, i cili sigurohet nga një burim në teqenë e fshatit. Po ashtu, banorët përdorin ujë nga ulluqet e shiut dhe lumi që kalon pranë fshatit për higjienën dhe nevojat e tjera.
Sipas tyre, autoritetet janë informuar për këtë situatë dhe u është kërkuar asfaltimi i 1 km rrugë, por nuk ka pasur asnjë reagim. Ura që lidh aksin kryesor Lozha – Maliq me fshatin Zboq është në kushte të këqija dhe rrezikon jetën, veçanërisht të fëmijëve.
Një banor i fshatit, gjatë protestës, tha: “Faleminderit që keni ardhur në fshatin Zboq. Ne jemi 15 familje dhe jetojmë në kushte shumë të vështira. Bashkia dhe komuna nuk na kanë ndihmuar fare, as për rrugë, as për ujësjellës dhe as për fëmijët. Rruga është shumë e keqe, makina shkakton tym dhe fëmijët kalojnë këtu. Nuk kemi ujë të pijshëm.”
Fshati ka vetëm 5 fëmijë që ndjekin shkollën në qytetin e Maliqit. Familjarët, të cilët ndodhen në kushte ekonomike të vështira, thonë se nuk kanë transport falas për fëmijët dhe janë të detyruar të paguajnë 1500 lekë në muaj për transportin, megjithë vështirësitë ekonomike.
