Dy të rinj janë ndaluar në Selanik, Greqi, përfshirë një greko-amerikan 21-vjeçar dhe një grek 18-vjeçar, nën akuzat për anëtarësim në një organizatë kriminale. Ky grupim akuzohet për shfrytëzimin seksual të vajzave të mitura me probleme mendore dhe shpërndarjen e materialeve pornografike me fëmijë.
Operacioni u zhvillua nga policia greke, e cila veproi në përputhje me urdhër-arrestet e lëshuara nga autoritetet përkatëse.
Më herët, 21-vjeçari ishte arrestuar pas një njoftimi nga Shtetet e Bashkuara për ekstradim, por Këshilli i Apelit në Selanik e refuzoi, me arsyetimin se ai kishte shtetësi greke dhe veprat ishin kryer në territorin grek.
Hetimet e Prokurorisë së Shkallës së Parë të Selanikut rezultuan në ngritjen e akuzave të rënda për të dy të rinjtë, përfshirë dëmtimin e qëllimshëm të minoreneve dhe shpërndarjen e pornografisë me fëmijë.
Sipas hetimeve, organizata operonte përmes platformave online, duke marrë në shënjestër viktima të reja, veçanërisht fëmijë nga 8 deri në 17 vjeç që kishin probleme mendore, të rinj të komunitetit LGBTQI+, dhe personat me ngjyrë.
Anëtarët e grupit ndanin video me akte dhune dhe materiale të tjera të rënda, që shpërndaheshin më pas nga organizata. Grupi, i njohur si “Organizata 764”, është i përshkruar nga autoritetet amerikane si një strukture ekstremiste dhe e dhunshme.
Gjatë dëshmisë së tij, 21-vjeçari mohoi çdo akuzë për përfshirje në aktivitete të tilla. Të dy të rinjtë pritet të paraqiten përpara gjyqtarit në Selanik, ku do t’u japin shpjegime për akuzat që u janë ngritur.
Ky rast nënvizon sfidat e shumta që përballen autoritetet në luftën kundër krimeve seksuale dhe shfrytëzimit të të miturve në epokën digjitale.
