Shërbimet e Komisariatit të Policisë Nr. 2 kanë finalizuar operacionin e koduar “Danger”, duke arrestuar një 30-vjeçar me rrezikshmëri të lartë shoqërore, i shpallur në kërkim për vrasje në rrethana cilësuese, mbetur në tentativë, dhe armëmbajtje pa leje.
Operacioni u zhvillua në vijim të punës për lokalizimin e shtetasve të shpallur në kërkim, bazuar në informacionet operative për vendndodhjen e 30-vjeçarit. Ai u kap në zonën e “Komunës së Parisit”, ndërsa gjatë arrestimit u evidentua edhe përdorimi i dy dokumenteve identifikimi të dyshuara të falsifikuara (kartë ID dhe leje drejtimi).
Në kuadër të këtij operacioni, u arrestua edhe një 31-vjeçar, i dyshuar për përkrahje dhe ndihmë për fshehjen e 30-vjeçarit. Gjatë kontrollit fizik të 31-vjeçarit u gjet një sasi municioni luftarak, ndërsa u sekuestrua edhe një automjet.
Sipas hetimeve, 30-vjeçari, Kid Kazazi, banues në Kavajë, më 30 maj 2025 në Fllakë, për motive të dobëta, ka qëlluar me armë zjarri drejt një automjeti ku udhëtonin tre shtetas. Për këtë vepër, Gjykata e Durrësit i kishte caktuar masën e sigurisë “Arrest në burg”.
Pas arrestimit, Kid Kazazi iu dorëzua DVP Durrës për veprime të mëtejshme hetimore.
